Башҡортостан юлдаш телеканалының файҙалы һәм ҡыҙыҡлы “Башҡорт телен өйрәнәм” проекты дауам итә. Проекттың икенсе миҙгеле башланды, алдағы аҙнала ул шишәмбе һәм шаршамбы көн, көндөҙгө сәғәт 11.00 тәғәйенләнгән. Дәрестәр Яңы йылға ҡәҙәр дауам итәсәк һәм хатта, аҙағында ҡатнашыусыларҙан имтихан алыу планлаштырылған. Проекттың икенсе өлөшөн дә йәш полиглот, башҡорт телен уҡытыу методикаһы авторы Вячеслав Чернев алып бара. Был юлы алып барыусы уҡытыу методикаһына бер аҙ үҙгәреш индергән, һөҙөмтәләр программа барышында тамашасы өсөн асыҡ буласаҡ. Төп бурысы- ҡатнашыусыны 12 дәрестә башҡорт телендә аралашырға өйрәтеү булған проектта сит ил граждандары, башҡорт телен быға тиклем белмәгән кешеләр ҡатнаша. Был проект сит ил халыҡтарының башҡорт теленә хөрмәте һәм ҡыҙыҡһыныуын асыҡ күрһәтә.