Баймаҡ ҡалаһының 1-се мәктәбендә халҡыбыҙҙың ҡомартҡыһын ятлаусы 26 уҡыусы зирәк һүҙ бәйгеһендә көс һынаны. Еңеү яулаусылар артабан район намыҫын республика кимәлендә яҡлаясаҡ.

Таһир ауылы мәктәбенең 6 класс уҡыусыһы Нәйлә Әлибаева ярышта икенсе йыл рәттән ҡатнаша. «Урал батыр» эпосы бәйгеһенә ул ныҡлы әҙерләнә, шуға ла әҫәрҙең төп геройҙары бәхәсен түкмәй-сәсмәй тыңлаусыға еткереү уға еңел бирелә.

Конкурстан Хәмит сәсәндең ейәнсәре Сәлимә Әлмөхәмәтова ла ситтә ҡалманы. Әйткәндәй, ул сарала йыл һайын әүҙемлек күрһәтә.

Сәсәнлек ярышында 7 команда көс һынашты. Улар араһында башланғыс класс уҡыусыларының булыуы, ҡатнашырға теләк белдереүселәрҙең йылдан- йыл артыуы ҡыуаныслы, тип билдәләй конкурсты ойоштороусылар.

Сәсәндәрҙән яҙылып алынған ҡомартҡыла башҡорт халҡының рухи ҡиммәттәре, донъяға ҡарашы бәйән ителә. Быуындан-быуынға күсә килгән бөйөк эпостың әһәмиәте баһалап бөткөһөҙ. Быйыл сәсәндәр бәйгеһе Баймаҡ ерендә үтә. Был осраҡлы түгел, сөнки Урал батыр эпосы тап ошо ерлектә башланғыс ала.

Сығанаҡ: Башҡортостан юлдаш телевидениеһы