30–31 май Сыуашстан Республикаһында Башҡортостан Республикаһының Мәҙәниәт көндәре үтә. Төп саралар Сыуаш опера һәм балет театрында үтәсәк. Сара Башҡортостан менән Сыуашстан араһындағы иҡтисади, мәҙәни бәйләнештәрҙе нығытыу килешеүенә ярашлы үтә.

Мәҙәниәт көндәрендә БР Президенты Р.З.Хәмитов, Сыуашстан етәксеһе М.В.Игнатьев, БР Хөкүмәт Премьер-министр урынбаҫары Л.С.Ғүмәрова, БР Мәҙәниәт министры Ә.И.Шафиҡова һәм башҡа абруйлы ҡунаҡтар ҡатнаша.

Байрам тантанаһы республикабыҙҙың сәнғәт оҫталары ҡатнашлығында концерт менән асыла. Унда “Мираҫ” йыр һәм бейеү ансамбле, “Арғымаҡ” этно-рок төркөмө, “Контраст” өлгөлө йыр һәм бейеү ансамбле, халыҡ-ара һәм Бөтә Рәсәй конкурстары лауреаттары Дилара Иҙрисова, Екатерина Ямщикова һәм ҡурайҙа оҫта уйнаған Марсель Сәйетов һәм башҡалар ҡатнаша. Опера театры фойеһында Башҡортостандың мәҙәниәте менән таныштырған фильм күрһәтеләсәк. Милли музей фондынан «Башҡортостан – Евразия ынйыһы», «Башҡорт халҡының материаль мәҙәниәте» күргәҙмәләре эшләйәсәк. К.В.Иванов исемендәге Сыуаш дәүләт академия драма театры сәхнәһендә М.Кәрим исемендәге Милли йәштәр театры «Беҙҙең өйҙөң йәме» спектакле менән сығыш яһай. Шулай уҡ Стәрлетамаҡ филармонияһының «Сарби» сыуаш эстрада-фольклор коллективы саранан ситтә ҡалмай. 

Сыуашстандың мәҙәниәт, милли эштәр һәм архив эше министры Вадим Ефимов әйтеүенсә, был сараларҙың маҡсаты ижади коллективтарҙың тәжрибә уртаҡлашыуы ғына түгел. Ул — башҡорттар менән сыуаштар араһындағы мөнәсәбәттәрҙе яҡшыртыуға ҙур аҙым. Сыуашстанда башҡорттар күп түгел, ә бына Башҡортостанда 117 мең сыуаш йәшәй.