Республикала икенсе тапҡыр ойошторолған байрамда быйыл Татарстандан , Ульяновск, Тольятти, Ырымбур ҡалаларының һәм шулай уҡ Ҡаҙағстандың Аҡтүбә ҡалаһының «Алаҡай» ҡурсаҡ театрҙары ҡатнаша. Фестиваль 30 сентябргә тиклем дауам итә. 

Тамашасыларҙы был көндәрҙә сағыу тамашалар көтә. Ижади коллективтар балаларға үҙҙәренең иң яҡшы спектаклдәрен тәҡдим итһә, актерҙар өсөн мәҙәни сара тәжрибә уртаҡлашыу һәм аралашыу майҙансығына әйләнәсәк. Фестиваль һуңында еңеүселәр асыҡлана. Әйткәндәй, иң яҡшы спектаклде кескәй жюри ағзалары үҙҙәре билдәләй. Бының өсөн баш ҡала мәктәптәренән һәләтле һәм йәмәғәт, мәҙәниәт тормошонда әүҙем ҡатнашҡан балалар һайлап алынған.