Был сағыу яҙ көндәрендә бөтә донъя баһалап бөткөһөҙ ҡаһарманлыҡ, ҡыйыулыҡ һәм фиҙакәрлек күрһәтеп, бөтә кешелектең киләсәген һаҡлап алып ҡалған ватандаштарыбыҙҙы иҫкә ала һәм тейешле хөрмәт-ихтирамын күрһәтә. Йылдар үткән һайын Ватаныбыҙ азатлығын һәм бөтә Ер йөҙөндә тыныслыҡты һаҡлап алып ҡалған халҡыбыҙҙың үлемһеҙ батырлығы тағы ла сағыулана һәм баҙыҡлана бара.

Ә. Вәлиди исемендәге Милли китапханала Бөйөк Еңеү байрамы алдынан «Һуғыш йылдары балалары» исемле хәтер кисәһе үтте. Ветерандар Милотворский Константин Леонидович, Йыһаншин Сабир Шәйәхмәт улы, һуғыш йылдары балалары Фәттәхова Ф.З., Камалетдинова А.И., Даутова Н.П., Кинзина Л.Л., Новицкий Д.Я., Фәхретдинова Н.С. менән осрашыуға Өфө ҡалаһының 39 гимназияһы уҡыусылары, Өфө сәнғәт училищеһы студенттары килгән ине.

Уларҙың үҫмер сағы Бөйөк Ватан һуғышы йылдарына тура килә. Был осорҙа ун йәше лә тулмаған балалар баҫыу эштәренә тотона: ер һөрә, иген сәсә, ураҡ ура, уңыш йыя. Тормоштоң әсе-сөсөһөн, ауырлыҡтарын үҙ иңендә татыған тылдағылар Еңеү көнөн яҡынайтыуға тос өлөш индергән.

Бөгөн улар - 80-90 йәшен тултырған оло быуын вәкилдәре. Дәһшәтле һуғыш, һуғыштан һуңғы үҙгәртеп ҡороуҙар уларҙың күңеленә мәңгелеккә уйылып ҡала. 

Бөйөк Еңеү тураһындағы иҫтәлек-хәтер күңелдәребеҙҙә мәңге һаҡланһын!

«Башҡортостандың мәҙәни донъяһы» порталы