Башҡортостандың рәссамдар берлеге башланғысы менән Әбйәлил районының Буранғол ауылында Бөтә Рәсәй форумы үтте. Күләмле был сарала илдең бик күп төбәктәренән билдәле рәссамдар ҡатнашты. Улар бер нисә көн дауамында райондың күркәм тәбиғәте һәм кешеләре менән аралашты, шулай уҡ РСФСР-ҙың атҡаҙанған сәнғәт эшмәкәре Михаил Нестеровты хөрмәтләп иҫкә алды.

Быйыл майҙа Башҡорт дәүләт художество музейына нигеҙ һалыусы Михаил Нестеровтың тыуыуына 150 йыл тулды. Оло юбилей уңайынан ойошторолған форумға Өфө, Екатеринбург, Пермь һәм Яр Саллы кеүек ҡалаларҙан бик күп рәссамдар килде. Сараны ойоштороу урыны итеп Әбйәлил районы һайланыуы бер ҙә осраҡлы түгел. Төбәк үҙенең күркәм тәбиғәте, эшсән һәм талантлы халҡы менән дан тота. Әбйәлил шулай уҡ күлдәр һаны буйынса ла республикала беренсе урынды биләй. Әлбиттә, бар был матурлыҡ ҡунаҡтарҙың ижадында ла сағылыш тапмай ҡалманы. Сара сиктәрендә тыуған әҫәрҙәр махсус күргәҙмәлә һәм айырым йыйынтыҡта урын аласаҡ. Бынан тыш, эштәрҙең иң уңышлылары “Тыуған ил ҡиәфәте” тип аталған Бөтә Рәсәй күргәҙмәһенә һайлап алынасаҡ.