14-28 ноябрҙә “Далан” фольклор-эстрада төркөмө Себер яҡтарында гастроль концерттары менән сәфәрҙә йөрөп ҡайтты. Сургут, Пыть-ях, Покачи, Новогановск, Яңы Уренгой ҡалаларында йәшәүсе яҡташтарыбыҙ “Далан” төркөмөн дәррәү ҡаршы алды. 

Миңзифа Искужина башҡарыуындағы “Ашҡаҙар”, “Уйыл”, “Хисам” кеүек башҡорт халыҡ йырҙары, Артур Туҡтағолов һәм Искәндәр Ғәзизовтар башҡарыуындағы “Әсәләмәғәләйкүм”, “Һай, Уралым” кеүек рухлы һәм дәртле йырҙар сит яҡта көн иткән яҡташтарыбыҙҙы тыуған моң тулҡынына күмде. Ҡурайсы Илнур Һибәтуллин залды ҡурай моңона сорнаһа, йәш бейеүселәр Элина Урманшина гүзәл һәм мөләйем башҡорт ҡыҙы “Заһиҙа”, Зарина Солтангилдина баҫҡан урынында ут сәскән сая, шаян татар ҡыҙы образында сәхнәне биҙәне. Артур Туҡтағолов һәм Миңзифа Исҡужинаның мөхәббәт һәм күңел йылыһы менән һуғарылған һоҡландырғыс дуэттары һис шикһеҙ бер-береңә булған наҙлы хис-тойғолар ялҡынын яңынан тоҡандырҙы. Шулай уҡ Нижневартовск ҡалаһында халҡыбыҙҙың милли батыры Салауат Юлаевтың тыуыуына 260 йыл тулыуға арналған концертта ла сығыш яһаны “Далан”дар. 

Тыуған яҡтарға әйләнеп ҡайтҡандай булдыҡ, тип йылы оҙатып ҡалды яҡташтарыбыҙ “Далан”дарҙы.