Рәссам Дамир Муратов Төмән өлкәһендә тыуып үҫеп, бына инде күп йылдар Омск ҡалаһында йәшәй.21-се декабрҙә рәссамдың «Конец цвета» тигән шәхси күргәҙмәһе асыла.
Күргәҙмәлә рәссамдың төрлө эштәре күрһәтеләсәк, һүрәттәрҙең күбеһе Дамир Муратовтың «Бөтә ерҙе кедр ылыҫы ҡаплаясаҡ» тип аталған эштәренән алынған.
- Мин үҙ эштәрем тураһында һүҙ йөрөтөргә яратмайым, - ти рәссам, - был минеңсә «маҡтаныу» тип атала. Мәҫәлән, китаптарҙы уҡыйҙар, музыканы тыңлайҙар, ә һүрәттәрҙе кеше ҡарай. Һүрәт оҡшай икән, был, әлбиттә, миндә ҡыуаныс тыуҙыра. Миңә күңелле һүрәттәр төшөрөргә оҡшай, мин әлегә йәшмен, сәстәрем ағармаған. Күп рәссамдәр оло йәшкә етеү менән, үҙҙәрен ниндәйҙер бер оракул һымаҡ күрә башлайҙар, донъяның дөрөҫлөгөн эҙләргә тотоналар. Ә кем белә һуң, ҡайҙа ул донъяның дөрөҫлөгө һәм уны нисек итеп ҡорорға? Минең уйлауымса күберәк эшләргә кәрәк.
Дамир Муратов Тобольск ҡалаһында 1967 йылда тыуған. 1988 йылдан башлап актив күргәҙмә эшен алып бара. Уның эштәрен Омск, Новосибирск, Новокузнецк, Курган, Зеленогорск, Сургут, ҡалаларының музейҙәрендә күрергә була.
Күргәҙмә 21-се декабрҙә сәғәт киске 7-лә асыла һәм ғинуарҙың 21–нә тиклем дауам ителәсәк.

«Башҡортостандың мәҙәни донъяһы» порталы