Хөсәйен Әхмәтов исемендәге Башҡорт дәүләт филармонияһында күренекле башҡорт композиторы Данил Хәсәншиндың юбилей кисәһе үтте. Етмеш биш йәштә лә ул талымһыҙ ижад итә. Юбилярҙы ҡотларға сәхнә оҫталары, туғандары, ҡунаҡтар йыйылды.
Данил Хәсәншиндың бала сағы ауыр һуғыш йылдарына тура килә. Әммә ул замандың барлыҡ ҡаршылыҡтарын еңеп сығып, билдәле композитор булыу бәхетенә ирешә. Әҫәрҙәрендә ижадсы тыуған иленә, халҡына, мөхәббәткә дан йырлай. Уның мәктәп балаларына яҙылған әҫәрҙәре, профессиональ сәхнә оҫталары өсөн айырым йыйынтыҡтары донъя күргән. Кисәлә йырсылар, музыканттар сығыш яһаны, юбилярҙың әҫәрҙәрен яратып башҡарҙы. Сығанаҡ: Башҡортостан юлдаш телевидениеһы