1936-1938 йылдарҙа БАССР Берләшкән театрҙарының Концерт-эстрада бюроһы эргәһендә ойошторолған бейеү коллективын бөгөнгө көндә республикала һәм Рәсәйҙә генә түгел, ә сит илдәрҙә лә таныйҙар һәм яраталар. 1938 йылдың 20 майында был коллектив тәүге концертын бирә. Коллектив ошо уҡ йылда яңы төҙөлә башлаған филармония янына күсерелә һәм Башҡортостан йыр, бейеү халыҡ музыкаһы ансамбле итеп үҙгәртелә. 

1939 йылда был коллективтың етәксеһе итеп Фәйзи Ғәскәров тәғәйенләнә. Ансамбль Башҡортостан халыҡ бейеүҙәре ансамбле тип атала һәм шул йүнәлештә эш башлай. Фәйзи Ғәскәров тәүге көндән үк халыҡтың боронғо сәнғәтен түкмәй-сәсмәй һаҡлап, камиллаштырып, сәнғәт юғарылығына күтәреүҙе маҡсат итеп ҡуя һәм шуға ирешә. 

1940 йылда ансамблдең Башҡортостан буйлап гастролдәре уҙа, 1955 йылда Мәскәүҙә үткән Башҡорт әҙәбиәте һәм сәнғәте көндәрендә ҡатнаша һәм ҙур уңышҡа ҡаҙана.

1988 йылда Халыҡ бейеүҙәре ансамбленә Фәйзи Ғәскәров исеме бирелә. 1996 йылда РФ Мәҙәниәт министрлығы ансамблгә «академия» статусын бирә.

Республика сәнғәте үҫешенә тос өлөш индергән ансамбль Ғәлимов Сәләм һәм Салауат Юлаев исемендәге республика премияларына лайыҡ була.