25 декабрҙә М.И. Глинка исемендәге Силәбе өлкәһе опера һәм балет театрында Башҡортостандың йәш опера йырсыһы Диляра Иҙрисованың беренсе сығышы үтте. Диляра А.С. Пушкиндың әкиәттәре буйынса ҡуйылған «Тылсымлы Лукоморье» балалар өсөн мюзиклында царевна ролен башҡарҙы. Диляраны беҙ төрлө илдәрҙә, Италия, Болгария, Австрияла үткән халыҡ-ара конкурстар лауреаты итеп беләбеҙ.
Диляра Иҙрисова 2007 йылда Өфөнөң урта музыкаль махсус колледжын, фортепиано класы буйынса тамамлай. 2007-2012 йылдарҙа, Өфө сәнғәт академияһында, профессор Миләүшә Мортазина класында, вокал буйынса белем ала. Опера йырсыһын әҙерләүҙә Эльмира һәм Марат Әхмәтзариповтар ҙа күп кенә көс һала.
Диляра тәү башлап З. Исмәғилев исемендәге I халыҡ-ара конкурсында еңеүгә (3–сө урын) өлгәшә. Аҙаҡтан Болгарияла һәм Татарстан Республикаһында үткән халыҡ-ара конкурстарҙа (2-се премия) лауреат исеменә лайыҡ була. Диляра шулай уҡ күп кенә Башҡортостанда үткән «Ирәндек моңдары» (Сибай, 2010 й.), Ғ. Әлмөхәмәтов исемендәге конкурстарта еңеүсе итеп таныла.
Силәбеләр беҙҙең йәш йырсының сығышын беренсегә күрҙе.

«Башҡортостандың мәҙәни донъяһы» порталы