2015 йылға тәғәйенләнгән «Башҡортса дини календарь» донъя күрҙе. Уның авторҙары—Сәләх Суҡбаев, Ғәлиә Ғәлимова, Фирҙәүсә Бикташева менән Әлфиә Илекәева. Был баҫмалағы аят, доға һәм сүрәләрҙең ғәрәпсә яҙылышы, транскрипцияһы, дини даталар Башҡортостан мосолмандары Диниә назараты рәйесе, мөфтөй Нурмөхәммәт хәҙрәт Ниғмәтулла тарафынан әҙерләнгән. 

«Башҡортса дини календар»ҙа ислам тәғлимәте, мосолман байрамдары, ай һәм ҡояшҡа бәйле астрономик мәғлүмәттәр, намаҙ уҡыу ваҡыттары бирелгән, мосолман ай иҫәбе күрһәтелгән. Был баҫма Ҡөрьән аяттары, хәҙистәр, дин ғалимдарының хеҙмәттәренән алынған хикмәтле фекерҙәр, ата-бабаларыбыҙҙың башынан үткән ғибрәтле хәлдәр менән байытып, тәрбиә мәҙрәсәһендәге дәрестәрҙе дауам итеү маҡсаты менән әҙерләнә.