10 декабрҙә Ҡазандың УНИКС концерт залында танылған ҡурайсы Роберт Юлдашевтың концерты үтәсәк.

Роберт Юлдашевтың исеме республикала ғына түгел, Рәсәй һәм донъя күләмендә лә киң таныулы. Роберт ҡурайҙа башҡорт музыкаһын ғына түгел, рус, татар, сит ил эстрадаһы, классик әҫәрҙәрҙе лә башҡара.

Музыкант Николай Носков, Гарик Сукачев, Пелагея менән хеҙмәттәшлек итә. Роберт Юлдашев Миландағы иң танылған теартҙарҙың береһе La Scala сәхнәһендә танылған опера йырсыһы Илдар Абдразаков менән сығыш яһағаны бар.

2006 йылдың йәйендә Роберт Юлдашев “Ҡурайсы” төркөмөн төҙөй. Төркөмдөң асылында боронғо башҡорт музыка ҡоралдары тора: дөңгөр, думбыра, ҡурай, ҡумыҙ.

Төркөмдөң жанр үҙенсәлектәре төрлө: фольк-мьюзик, джаз-рок, этно-джаз, симфоник оркестр музыкаһы, chill out һәм lounge, ләкин төркөм өсөн рухи яҡтан иң яҡыны — этно-транс мьюзик. Коллективтың репертуарында башҡорт фольклор музыкаһы, автор музыкаһы, танылған композицияларға каверҙар тора.

Күптән түгел Роберт Юлдашев үҙенең “Ҡурайсы” төркөмө менән Рәсәй буйлап турҙарын башлап ебәрҙеләр. Турға кергән ҡалалар араһында Вологда, Екатеринбург, Оренбург, Омск, Ҡазан һәм башҡа ҡалалар бар. Гастролдәр барышында Роберт Юлдашев Сауд Ғәрәбстанында ла булып өлгөргән.