Яҙҙың иң матур байрамдарының береһе, Халыҡ-ара ҡатын ҡыҙҙар байрамы алдынан, 5 мартта, «Нефтсе» мәҙәниәт һарайында «Башҡорт йыры» ойошторған «Дүрт миҙгелдә ҡатын-ҡыҙ» исемле байрам концерты үтте.
Ике бүлектән торған, бай эстәлекле тамашаны БР атҡаҙанған артистары Сара Буранбаева, Фирҙәт Ғәлиев, Азамат Ғафаров алып барҙы.
Борон-борондан алып бөгөнгө көндәргә тиклем әсәйҙәрҙе, ҡатын-ҡыҙҙарҙы данлап, уларға арнап күп һүҙҙәр әйтелгән, йырҙар йырланған, шиғырҙар яҙылған.
Был байрам тамашаһында ла әсәйҙәргә, гүзәл заттарға арналған йырҙар яңғыраны. Концерттың беренсе бүлеге халҡыбыҙҙың рухи ҡомартҡыларынан һаналған халыҡ йырҙарынан («Зөлхизә», «Сәлимәкәй» «Йәнбикә», «Ҡаһым түрә» һ.б.) торҙо.
Икенсе бүлекте ҡунаҡтар, Сибай дәүләт филармонияһының бейеү ансамбле асты. Артабан эстрадабыҙҙың билдәле артистары Фәриҙә һәм Роберт Тимербаевтар, Рәсүл Ҡарабулатов, Гөлсөм Бикбулатова, Рөстәм Шаһибалов, Фәдис Ғәниев, Лилиә Биктимирова, Гөлназ Асаева, Светлана Хәкимова, Сәғиҙулла Байегет, Алһыу Бәхтиева, Хәсән Усманов һ.б. йырҙарын әсәйҙәргә, гүзәл заттарға бағышланы.