Бөгөн, 25 декабрь, БР Милли музейында шағир һәм әүҙем йәмәғәт эшмәкәре Зәкир Рәмиевтың тормош һәм ижад юлына арналған «Дәрдмәнд» күргәҙмәһе асыла.

Күргәҙмәлә шулай уҡ данлыҡлы ғаиләнең башҡа ағзалары хаҡында ла мәғлүмәт табып була аласаҡ. Экспозицияла фотоһүрәттәр, китаптар, төрлө мәҡәләләр һәм Рәмиевтарҙың шәхси әйберҙәре ҡуйыласаҡ.

Ағалы ҡустылы Шәкир һәм Зәкир Рәмиевтар әүҙем йәмәғәт һәм сәйәсәт эшмәкәрҙәре. Уларҙың ярҙамы менән Ырымбур ҡалаһында «Ваҡыт» гәзите, «Шура» журналы сыға. Мәрхмәтлек менән дә актив шөғөлләнәләр. Улар татар яҙыусыларының китаптарын баҫтырышалар, мәсеттәр, мәҙрәсәләр төҙөтәләр, һәләтле башҡорт һәм татар балаларын үҙ иҫәптәренә абруйлы уҡыу йорттарында уҡыталар. 

Зәкир Рәмиев үҙе лә әҙәбиәт менән шөғөлләнә. Дәрдмәнд исеме аҫтында үҙенең шиғри әҫәрҙәрен яҙа. 

Илдә Совет власы урынлашҡас, Рәмиевтарға ҡараш үҙгәрә, уларҙың тамырҙарының буржуаз булыуына, эксплуатар синыфҡа ҡарауҙарына баҫым яһала. Бөгөнгө көндә заманында төбәктең үҫешенә тос өлөш индергән шәхестәргә ҡараш ыңғай яҡҡа үҙгәрҙе.