24 майҙа М. Кәрим исемендәге Милли театрҙа Дөйөм Рәсәй китапханалар көнө уңайынан уҙғарылған профессиональ оҫталыҡ буйынса республика конкурстары «Башҡортостан Республикаһының иң яҡшы китапхана сайты», «Һайлаусыларҙың хоҡуҡи мәҙәниәтен үҫтереү өсөн ойошторолған иң яҡшы эш», «КонсультантПлюс – информацион навигатор» еңеүселәрен ҡотлау тантанаһы үтте.

Һәр йыл яҙ айының матур бер көнөндә китапханасылар үҙҙәренең профессиональ байрамын ҡаршылай. Фәҡәт ошо көндә 1795 йылда Рәсәйҙә беренсе китапхана асыла.

Китапханалар фондында халҡыбыҙҙың иң ҡиммәтле рухи байлығы: олатайҙарҙың быуаттар төпкөлөнән ҡағыҙға, туҙға яҙып ҡалдырған мираҫы, киләсәккә васыяттары, ғалимдарҙың уй-фекерҙәре, шағирҙарҙың, яҙыусыларҙың йөрәген ярып сыҡҡан юлдары. Бөтәһе лә ҡәҙерләп һаҡлана, халыҡҡа еткерелә. 

Еңеүселәрҙе БР Мәҙәниәт министры вазифаһын башҡарыусы Дәүләтова Камилә Йәүҙәт ҡыҙы сәләмләне: «Ҡәҙерле китапхана өлкәһендә хеҙмәт итеүселәр! Бөгөн һеҙҙе ошо тантанала күреүемә бик шатмын. Һеҙ халҡыбыҙҙың борондан килгән ғөрөф-ғәҙәттәрен, ауыҙ-тел ижадын йыяһығыҙ, һаҡлайһығыҙ. Һеҙҙе һөнәри байрам менән ихлас ҡотлайым һәм рәхмәтемде еткерәм » - тине. Камилә Йәүҙәт ҡыҙы бер төркөм эш алдынғыларын БР Мәҙәниәт министрлығының маҡтау ҡағыҙҙары менән бүләкләне. Шулай уҡ министрлыҡтың рәхмәт хаттары менән китапханаларға даими матди ярҙам итеүсе бағыусылар бүләкләнде.

Артабан ҡотлауҙар өсөн һүҙҙе Башҡортостан Республикаһы Матбуғат һәм киң мәғлүмәт министрлығы министр урынбаҫары Марат Әсхәт улы Ғәзизов алды. Марат Әсхәт улы «Башҡортостан Республикаһының иң яҡшы китапхана сайты» еңеүселәрнен тәбрикләне.

Шулай уҡ китапханаларға Башҡортостан Үҙәк һайлау комиссияһы рәйесе урынбаҫары Наилә Фаяз ҡыҙы Алтынова, «Эдвис» уҡыу-методик үҙәге директоры Эдуард Вил улы Сәйетбатталов, «Медиолюкс» компанияһы директоры Валерий Евгеньевич Брекоткин, «Педагогик китап» ғилми-методик үҙәге директоры Тимербулат Солтан улы Хоҙайғолов, «Планета» һатыу нөктәләре менеджеры Венера Ғәзнәүи ҡыҙы Әхтәмова һ.б. үҙҙәренең махсус бүләктәрен әҙерләгәйне. 

Автор: Гөлназ Ишемғужина