Хәйбулла районының Һамар ауылында Еңеү көнөндә Бөйөк Ватан һуғышында ҡатнашҡан яҡташтарға икенсе һәйкәл асыу тантанаһы үтте. Беренсе мемориал һуғышта һәләк булған 300-ҙән ашыу ауылдаштарының исемен мәңгеләштерә. Хәҙер иһә фронттан ҡайтып, һуғыштан һуңғы йылдарҙа мәрхүм булған 138 Бөйөк Ватан һуғышы яугирына монумент асылды.

Мемориал район һәм урындағы бюджет аҡсаһына эшләтелгән. Аҡ мәрмәрҙән яһалған һәйкәлдә алтын хәрефтәр менән: «Беҙ барып еттек. Беҙ еңдек!», — тип яҙылған.

Һәйкәлде асыу тантанаһында Хәйбулла районы хакимиәте башлығы Рөстәм Хәйруллин, яҡташ яугирҙарының исемен мәңгеләштереү буйынса ҙур эштәр башҡарған Һамар ауылы халҡынан үрнәк алырға кәрәк, тип билдәләне. Бындай мемориалдар уҙған быуаттың 90-сы йылдарынан бирле эшләнгәне юҡ.

Сығанаҡ: «Башинформ»