Күгәрсен районында халҡыбыҙҙың боронғо эсемлеген әҙерләүсе оҫталар йыйыны үтте. Башҡортостандың төрлө төбәктәрендәге ҡымыҙ бешеү рецепттары бер урында тупланды. Күгәрсен районының Дауыт-Ҡайып ауылы эргәһендәге аҡланда республиканың алдынғы йылҡысылыҡ хужалыҡтары, фермерҙар, хатта шәхси ихатаһында йылҡы малын көтөүселәр йыйылды. Конкурстың төп маҡсаты ҡымыҙ бешеү оҫталарын бергә туплау. 

Баймаҡ районынан Иҫәновтар сейәле, баланлы, еләкле ҡымыҙҙы  алып килгән. Милли эсемлек тәмен улар боронғо рецепттар буйынса Башҡортостанда үҫкән емеш-еләк һәм үләндәр менән байытып әҙерләй. 

Умартасылыҡ һәм апитерапия буйынса ғилми тикшеренеү институты иһә баһалама ағзалары иғтибарына оҙаҡ йылдар барған фәнни эҙләнеүҙәргә нигеҙләнгән яңы эсемлек - баллы ҡымыҙҙы тәҡдим итте. Татлы алтын, милли эсемлектең һаҡлау ваҡытын оҙайта тигән фекерҙә институт етәксеһе Әмир Ишемғолов.

Ҡымыҙ бешеү оҫталары ярышы менән бер рәттән йылҡы көтөүселәре көс һынашты. Өйөрҙө дөрөҫ туплау, сыбыртҡы, мал көтөү ҡоралдары менән файҙаланыу оҫталығы ла баһаланды.

Конкурста ҡатанашыусылар шулай уҡ Тәүәкән ауыл хужалығы предприятиеһының алдынғы тәжрибәһе менән дә яҡындан танышты. Йылҡысылыҡ фермаһында улар заманса ҡорамалдар ярҙамында ҡымыҙ бешеү алымын үҙләштерҙе.