10–11 июлдә Ейәнсура районының «Алһыу елкән» балалар сәләмәтләндереү лагерында ҡурайсыларҙың һәм йырсыларҙың – БР-ҙың халыҡ артистары Сөләймән Абдуллин, Мәғфирә Ғәлиеваның, РФ һәм БР-ҙың атҡаҙанған мәҙәниәт хеҙмәткәре Нәжметдин Хәсәновтың исеменә бүләктәргә башҡорт йырҙарын башҡарыусыларҙың асыҡ конкурсы үтә. Быйыл ул Мәҙәнит йылына арнала.

Конкурстың төп маҡсаты – Ейәнсураның арҙаҡлы шәхестәренең ижадтарын пропагандалау, яңы таланттарҙы билдәләү, уларҙың башҡарыу оҫталығын күтәреү һәм йәштәрҙе башҡорт халыҡ музыкаһына йәлеп итеү. Бәйгелә 16 йәшкә тиклем һәм 17 йәштән өлкәнерәк төркөмдәрҙә ҡурайсылар һәм йырсылар ҡатнаша. Сығыш яһаусылар оҙон көйлө бер башҡорт йырын башҡарырға тейеш, икенсе йыр ҡатнашыусының һайлауы буйынса халыҡ йәки композитор йыры була ала. Ҡурайҙа яңғыҙ башҡарыусылар һәм ансамблдәр ҡыҫҡа һәм оҙон көйҙәр башҡарырға тейеш. Айырыуса призына арналған йырсыларҙың репертуарынан йырҙар ҡабул ителә. Номинциялар буйынса ла бүләктәр ҡаралған.