Виртуоз ҡурайсы Роберт Юлдашев һәм «Ҡурайсы» төркөмө 5 ноябрҙә Екатеринбург ҡалаһында концертын ойоштора.

Ысынлап та, Роберттың концерттарын башҡорттар йәшәгән бар төбәктәрҙә лә ҙур ҡыуаныс һәм эске тулҡынланыу менән көтөп алалар. Сөнки Роберттың үҙенә генә хас моңо, уйнау манераһы бар. Күптәр Роберт Юлдашевтың һәм ул төҙөгән “Ҡурайсы” музыка төркөмөнөң сығышын күреп, тетрәнеп, һоҡланып, илһамланып ҡайта.

Роберт Юлдашев Башҡортостанда ғына түгел, Рәсәй һәм донъя киңлектәрендә лә оло популярлыҡ яулай. Владимир Спиваков һәм уның “Рәсәй виртуоздары”, Николай Носков, Гарик Сукачев, Пелагея кеүек Рәсәй йондоҙҙары менән бер сәхнәлә сығыш яһап, милли музыка ҡоралыбыҙҙы данланы, уның мөмкинлектәренең сикһеҙлеген танытты.

Роберт ҡурайсыларҙан иң беренсе булып милли моңдо “Дом сольнца” кеүек киноларҙың саунд-тректарында ла ишеттерҙе. Ҡурайҙың Башҡортостан киңлектәренән сығып, донъя гиҙеүе өсөн Роберт Юлдашевҡа афарин тиергә генә ҡала.