Рәсәй Фәндәр академияһы Өфө ғилми үҙәге Тарих, тел һәм әҙәбиәт институты башҡорт халҡының тарихын, телен, мәҙәниәтен һәм фольклорын өйрәнеү, һаҡлау, таратыу буйынса ҙур эш алып бара. 

Бөгөнгө көндә институтта бөтәһе ете бүлек эшләй: тел ғилеме, әҙәбиәт ғилеме, фольклористика, этнология, археология, хәҙерге тарих, тарих һәм мәҙәниәт тарихы. Һәр бүлектең үҙ йүнәлештәре бар. 

Институт халыҡтан йыйған байлыҡты халыҡҡа ҡайтарыу менән шөғөлләнә. Экспедицияларға йыл да сығып олатай-өләсәйҙәренән ҡалған изге ҡомартҡыларҙы йыялар. Милләтебеҙгә бәйле барлыҡ сығанаҡты (ҡулъяҙмаларҙы ғына түгел, халыҡ ижадын, һөйләштәрҙе, диалекттарҙы) йыйып, баҫтырып сығарыу уларҙың төп эше.

80 йыл эшләү дәүерендә күп томлы «Башҡорт әҙәбиәте тарихы», «Башҡорт теле һүҙлеге», «Башҡорт халҡының антропологияһы» «Башҡорт халыҡ ижады», «Әҙәбиәт тарихы», «Әлшәй фольклоры», «Дәүләкән фольклоры», «Борай фольклоры» «Башҡорт халҡының килеп сығышы», «Башҡорттарҙың туғанлыҡ системаһы» һ.б. китаптар сыҡҡан. Бөгөнгө көндә институт «Башҡорт теленең академик һүҙлеге» өҫтөндә эшләй. Ике томы сыҡҡан, бөтәһе 10 томда буласаҡ.

Институттың ҡулъяҙмалар һәм иҫке китаптар фонды бар. Фондта ете мең тирәһе ҡулъяҙма һәм иҫке китап тупланған, унда хатта XIV быуатҡа ҡараған ҡулъяҙмалар бар. Был яҙмаларҙың барыһы ла ғәрәп графикаһы менән яҙылған.

Халҡыбыҙҙың милли хазинаһы булып торған ойошма быйыл үҙенең 80 йыллыҡ юбилейын билдәләй. Ошо уңайҙан 21 – 22 июндә V Бөтә Рәсәй төркиәт конференцияһы уҙғарыла. «Урал – Алтай: быуаттар аша киләсәккә» тип исемләнгән мәртәбәле форумда танылған ғалимдар ҡатнашасаҡ.

«Башҡортостандың мәҙәни донъяһы» порталы