22 майҙа Стәрлетамаҡ дәүләт театр-концерт берләшмәһендә Башҡортостандың халыҡ артисы Филарит Әбделғәзим улы Бакировтың Хәтер кисәһе уҙҙы. 

Киң амплуалы актер, талантлы режиссер, оҫта тәржемәсе булараҡ билдәлелек яулаған Филарит ағай Бакировтың арабыҙҙан китеүенә бер йылдан ашыу ваҡыт үтһә лә, уның эшләгән эштәре, театрҙа ҡалдырған яҡты эҙе һаман да йәшәй. Сөнки 40 йылдан ашыу сәхнә ғүмерендә сәхнә батшаһы йөҙләгән һәм төрлө характерҙағы образдар тыуҙырып тамашасы һөйөүен яулап өлгөргән.

Актерҙы иҫкә алырға Филарит ағай эшләп киткән Салауат башҡорт драма театрынан һәм М.Ғафури исемендәге Башҡорт академия драма театрынан сәхнәләш дуҫтары, ижадының иң сағыу осорон бергә үткән Стәрлетамаҡ башҡорт театрынан коллегалары йыйылып, Филарит ағай тарафына бихисап йылы һәм юҡһыныу һүҙҙәре әйтелде. Шулай уҡ ҡасандыр ул уйнаған спектаклдәрҙән өҙөктәр күрһәтелде. Кисәне Филарит ағайҙың ҡатыны Башҡортостандың халыҡ артисткаһы Ниса Бакирова ойошторҙо. 

Г.СОБХАНҒОЛОВА