Кисә Хөсәйен Әхмәтов исемендәге Башҡорт дәүләт филармонияһында 75-се ижад миҙгелен ябыу айҡанлы ҙур байрам концерты уҙҙы. Коцерт «Юбилей экспресы» тигән үҙенсәлекле исем аҫтында үтте. Ысынлап та, исеме есеменә тап килде – ижади поезд тамашасыны филармония тарыхының иң әһәмиәтле ваҡиғалары буйлап йөрөттө. 

Концерт халҡыбыҙҙың мәшһүр йырҙары менән асылды. Тамашасы Азамат Тимеров, Марсель Ҡотоев башҡарыуында «Әрме», «Сибай» йырҙарын тыңлап кинәнде, республикабыҙҙың йөҙөк ҡашы булған, ижад юлын тап филармонияла башлаған Фәйзи Ғәскәров исемендәге дәүләт халыҡ бейеүҙәре ансамбле башҡарыуында «Гөлнәзирә» бейеүен ҡарап дәртләнде. 

Ижади поезд елеп кенә барманы, ә «Тамырҙар», «Халыҡсан», «Ретро», «Хор», «Джаз» кеүек туҡталыштарҙа туҡтаны, тамашасыны тарих төпкөлөнә ташланы,уйландырҙы, моңландырҙы. Концерттың үҙенсәлеге хаҡында ла әйтеп үтке килә: тере экрандарҙа филармония үҫешенә тос өлөш индергән легендар шәхестәр – Хөсәйен Әхмәтов, Ишмулла Дилмөхәмәтов, Сөләймән Абдуллин, Фәриҙә Ҡудашева, Ильфак Смаков, Ғәле Хәмзин, данлыҡлы Кәтүк менән Бағана, Радик Гәрәев, Таһир Сәйфуллиндарҙың тере һындарын, хатта сығыштарын ҡарау мөмкинселеге булды. Сәнғәт оҫталары барыһы ла тере тауышҡа йырланы, йыр-моңға һыуһаған тамашасы күңеленә был айырыуса хуш килде, һәр сығыштарҙы «Афарин!» ҡысҡырып оҙаттылар. 

Бер һүҙ менән әйткәндә концерт бер тында үтте, хатта етмәй ҡалды. Киләһе осрашыуҙар теләп, күтәренке кәйефтә таралышты сәнғәт һөйөүселәр.