Башҡортостандың халыҡ яҙыусыһы, драматург Флорид Бүләковтың «Изге эш» пьесаһын Финляндияның Йоэнсуу һәм Варкаус ҡалаларында Карелияның Милли театры сәхнәләштерәсәк.

Был спектакль театрҙа бик популяр икән, шуға күрә уны фин тамашасыһына күрһәтергә булғандар.

Пьесаның сюжеты мауыҡтырғыс: төпкөл ауылда әбей менән бабай йәшәй. Бабай хәл өҫтөндә, аҙна буйына иҫенә килә алмай түшәктә ята. Ниндәйҙер мөғжизә менән бабай аңына килә һәм әбейгә төшөн һөйләй: үлемде күрә һәм ул бабайға артабан йәшәр өсөн шарт ҡуя – өс сәғәт эсендә берәй изгелек эшләргә. Бер изгелек ғүмерҙе 10, ике – егерме, өс – утыҙ йылға оҙата, имеш. Был ҡыҫҡа ваҡыт эсендә ғөмүмән изгелек эшләп өлгөрөп буламы? Яуапты пьесанан табырға була.