Башҡорт дәүләт университетының сит телдәр факультеты эргәһендәге һәүәҫкәр театр франкофон театрҙар фестиваленә әҙерләнә. Бөгөн студенттар сираттағы репетицияға йыйылды.

Тимур Алтынғужин Башҡорт дәүләт университетының 1 курсында белем ала. Театрға махсус һынау аша үткән егет өсөн был сара тәүгеләрҙән. Сөнки спектаклдә ролгә инеп уйнауҙан тыш, французса таҙа итеп һөйләшеү шарт.

Спектаклдә социаль тема - ата-әсә һәм бала мөнәсәбәте яҡтыртыла. Сәхнә әҫәренә тамаша ҡылған Францияның Руан ҡалаһы ҡунағы Фредерик Коффар студенттар ижадына айырыуса һөйөндө.

Үҙенсәлекле костюмдар, моңло француз теле бер кемде лә битараф ҡалдырманы. Иң мөһиме студенттар үҙ мөмкинлектәрен һәм һәләтен бар камиллыҡта күрһәтте.

Башҡорт дәүләт университетында француз телен һәм әҙәбиәтен өйрәнеү ошо һүҙҙәрҙән башлана. Юғары уҡыу йортонда француз теле дәрестәре 60 йылдарҙан уҡытыла. Әле бында 300 ашыу студент тел нескәлектәрен өйрәнә.

Ләйсән Ҡоланбаева.

Сығанаҡ: Башҡортостан юлдаш телевидениеһы