«Евразия йөрәге» заманса халыҡ сәнғәте фестивале сиктәрендә Фәйзи Ғәскәровтың тыуыуына 100 йыл тулыу айҡанлы концерт үтте

Фәйзи Ғәскәровтың тыуыуына 100 йыл тулыу айҡанлы, 24 ноябрҙә «Нефтсе» мәҙәниәт һарайы сәхнәһендә «Евразия йөрәге» тип исемләнгән заманса халыҡ сәнғәте фестиваленең гала-концерты үтте.

Уның исеме башҡорт бейеү сәнғәтенә алтын хәрефтәр менән яҙылған һәм ҡасандыр үҙе етәкләгән коллективынан айырылығыһыҙ. БАССР-ҙың театрҙар берекмәһе концерт-эстрада бюроһы эргәһендә бейеү коллективы 1936-1938 йылдарҙа ойошторола. Коллектив ошо уҡ йылдарҙа яңы төҙөлә башлаған филармонияға күсерелә һәм Башҡорт йыр, бейеү, халыҡ музыкаһы ансамбле итеп үҙгәртелә. 1939 йылда уның етәксеһе итеп Фәйзи Ғәскәров тәғәйенләнә. Данлыҡлы балетмейстрҙың тыуыуына 100 йыл тулыу уңайынан ойошторолған юбилей саралары дауам итә.

Заманында Башҡорт халыҡ бейеүҙәре ансамбленең донъя кимәлендә танылыуына драма театры артистары Бәҙәр Йосопова, Таңһылыу Рәшитова, Ғиниәт Ушанов, композитор Таһир Кәримов һәм башҡа сәнғәт әһелдәренең ярҙамы ҙур була. Фәйзи Ғәскәров тәүге көндән үк халыҡтың боронғо сәнғәтен һаҡлап, камиллаштырып, сәнғәт юғарылығына күтәреүҙе маҡсат итеп ҡуя. Сәхнәгә тәүге бейеүҙәр ҡуйыла, коллектив данға күмелә башлай.