Башҡорт яҙыусыһы, юмор һәм сатира оҫтаһы Марсель Сәлимов Болгарияның Габрово ҡалаһында ижад кисәһен үткәрҙе. Был төбәк бөтә донъяға көләмәстәре менән билдәле, Габровола 40 йылдан ашыу юмор һәм сатира йорто эшләп килә. Әйткәндәй, йорт музейында Марсель Сәлимовтың ижад емештәре лә һаҡлана. Яҡташыбыҙҙың ижад кисәһе һәм китаптар күргәҙмәһе лә ошо тарихи бинала үтте.

Марсель Сәлимовтың Болгария менән дуҫлығы мәктәп йылдарында уҡ башлана. 14 йәшлек үҫмер Ҡара диңгеҙ буйы ҡыҙы Недялка Тодорова менән хат алыша. Болгар ҡыҙына арналған шиғыр юлдары ла тыуа, әммә уларға осрашырға насип булмай. Шулай ҙа был хаттар ике аралағы ижади бәйләнешкә нигеҙ һала. Марсель Сәлимов Габрово сатира һәм юмор йорто менән тығыҙ хеҙмәттәшлек итә башлай, урында ойошторлған фестивалдәргә даими саҡырыла. Был юлы Габровола яҡташыбыҙ дуҫлыҡ китабының исем туйын да үткәрҙе. Башҡортостан-Болгария дуҫлыҡ йәмғиәте ярҙамында донъя күргән йыйынтыҡ өс телдә нәшер ителгән. Унда 50 йыл элек ошо һөҙөмтәле дуслыҡ күперенә этәргес яһаған «Болгар ҡыҙы» шиғыры ла урын алған. Марсель Сәлимов был юлы уның геройын табырға ла ҡарар итә.

«Башҡортостандың мәҙәни донъяһы»