14 февралдан 17 февралгә ҡәҙәр Татарстандың Яр Саллы ҡалаһында М.Ғафури исемендәге Башҡорт дәүләт академия драма театрының гастролдәре уҙасаҡ.
Театрҙың директоры Хөрмәтулла Үтәшев әйтеүенсә, бындай гастролдәр 2 йылға бер ойошторола. Татарстан тамашасылары беҙҙең театр сығыштарын бик йылы ҡаршылайҙар.
Гастролде асып, 14 февраль көнө Сара Садыҡова исемендәге концерт залында театрлаштырылған концерт көтөлә. Программала – Фидан Ғафаров, Хөрмәтулла Үтәшев, Суфия Ҡорбанғәлиева, Миңзәлә Хәйруллина, Алмас Әмиров, Әхәт Хөсәйенов, Светлана Хәкимова, Алһыу Бәхтиева, Сәғиҙулла Байегетов һәм башҡа артистар ҡатнашлығында халыҡ яратып, үҙ итеп өлгөргән спектаклдәрҙән өҙөктәр, моңло йырҙар, дәртле бейеүҙәр, ҡурай моңдары. Гастролдең икенсе көнөндә - 15 февраль Яр Саллы ҡалаһы халҡына академтеатр балаларҙың яратҡан тамашаһына әүерелгән А.Толстой әкиәте буйынса әҙерләнгән «Алтын асҡыс» һәм Т.Дәүләтбирҙинаның «Минең ғаиләм» пьесаһы буйынса ҡуйылған спектаклдәрен тәҡдим итә.
16 февраль көндөҙгө ваҡытта «Алтын асҡыс» әкиәте ҡабаттан балаларҙы һөйөндөрһә, киске сәғәттәрҙә 5 йыл рәттән ҙур уңыш менән барған Т.Миңнуллин пьесаһы буйынса ҡуйылған «Мулла» спектакле көтөлә. Спектаклдәр ваҡыты: «Алтын асҡыс» - 11.00, 13.00 ч. «Мулла», «Минең ғаиләм» - 19.00 ч. Сығанаҡ: «Тамаша»