Еңеү көнө алдынан Башҡортостанда — «Георгий таҫмаһы» һәм «1941-1945 иҫләйбеҙ!» акциялары үтә. «Георгий таҫмаһы» акцияһы республикала 2005 йылдан үткәрелә, ә «1941-1945 иҫләйбеҙ!» акцияһын үткәреү идеяһы «Башҡортостандың мәҙәни донъяһы» интернет-порталы менән тәҡдим ителде, ул республика һәм ҡалаларҙың Һуғыш һәм хеҙмәт ветерандары советтары, шулай уҡ Республика Хәрби Дан музейы менән берлектә үткәрелә. Акция барышында ветерандар һәм мәктәп уҡыусылары Хәрби Дан музейына, шулай уҡ ике тапҡыр Советтар Союзы Геройы Муса Гәрәевтың тыуған яғына барасаҡ.

Был акция сиктәрендә Өфөгә «Нефтсе» мәҙәниәт һарайы саҡырыуы буйынса ике тапҡыр Ҡыҙыл байраҡ орденына лайыҡ булған А.В. Александров исемендәге йыр һәм бейеү ансамбле киләсәк. Ансамбль Рәсәйҙең иң ҙур хәрби коллективтарының береһе. Үҙенең 83 йыл эшләү дәүерендә ул Өфөлә бер тапҡыр ғына сығыш яһаған.

Бөгөн «Башҡортостандың мәҙәни донъяһы» хеҙмәткәрҙәре, Өфө ҡалаһының Һуғыш, хеҙмәт, Ҡораллы Көстәр һәм хоҡуҡ һаҡлау органдары ветерандары советында ошо үтәсәк концертҡа ветерандарға саҡырыу билеттары тапшырҙы.