Ауырғазы районының Толбазы ауылы ҡыҙы Рәсәйҙең төрлө төбәктеренән 8 мең ярым ҡатнашыусы араһынан һайлап алына. Бәйгегә үткән 500 конкурсанттан проектта ни бары 130 бала сығыш яһай.

"Беләһеңме, барыһы ла буласаҡ әле" ("А знаешь, все еще будет") - Алла Пугачева репертуарынан алынған был йыр тулҡынланыу ҙа, яуаплылыҡ та талап итә. Рушана Вәлиева студия тамашасыларын әсир итеп, телевизор ҡараусыларҙың һөйөүен яуланы. Ул - проектта Башҡортостандан берҙән-бер ҡатнашыусы.

Рушана әсәһе менән проекттағы сығышын ҡат-ҡат ҡарай. Сәхнәлә тулҡынланған, баштан мең төрлө уй үткән ваҡытты ул хәҙер йылмайып хәтерләй. Әйткәндәй, 14 йәшлек үҫмерҙең был ҙур сәхнәләге тәүге сығышы. Ғариза ҡабул итеүгә ике көн ҡалды тигәндә, ул сығышын кеҫә телефонына төшөрөп "Беренсе каналдың" рәсми сайтына ебәрә. Күп тә үтмәй Рушана Вәлиева Останкиноға саҡырыу ала.

Бер ваҡытта буш ултырырға ваҡыты юҡ, ти Рушананың ата-әсәһе. Мәктәп, йәмәғәт тормошо, йорт эштәре, яратҡан шөғөлө - һәммәһенә лә ваҡытын тигеҙ бүлә ул.

Хәҙер, Рушана скрипканы ҡулынан төшөрмәй. Рәсәй, сит ил хиттары композицияларын яратып башҡара. Яҡташыбыҙ, күренекле йырсы Земфира өлгөһөндә йырларға яратҡан ҡыҙ киләсәктә юрист булырға хыяллана. Йырҙа әйтелгәнсә, "Барыһы ла алда әле".

Сығанаҡ: БЮТ сайтынан