Йәш режиссер Гөлназ Ғәлимуллинаның документаль фильмы абруйлы «Нью-Йорк фестивале» Халыҡ-ара конкурстың финалына сыҡҡан тип хәбәр иткәйнек инде. Әле ҡыуаныслы хәбәр бар: Гөлназдың эше биш еңеүсе араһында! Кисә, Лас-Вегас ҡалаһында, Гөлназ еңеүселәрҙе бүләкләү тантанаһында ҡатнашты.

«Күл янындағы өй» («Дом у озера») документаль фильмы реаль ваҡиғаларға нигеҙләнгән, ул 10 йыл элек Германия күгендә булған һәләкәт хаҡында. 

Был конкурстың тарихы бай, ул 1957 йылдан үткәрелә һәм абруйлы фестивалдәрҙән иҫәпләнә. Гөлназдың эше 50 илдең меңгә яҡын эштәре араһынан һайланып алынған.

Талантлы уҡыусы, авиакатастрофала һәләк булыусы Кирилл Дегтяров Испанияға китер алдынан төшөргән һүрәтен «Күл янындағы өй» тип атай. Был һүрәтте әсәһе һуңынан табып ала. Фильмдың шундай исемле булыуы осраҡлы түгел. 70 кешенең ғүмере өҙөлгән ҡурҡыныс авиакатастрофа әле булһа ла йөрәктәрҙе өшөтә. Фильмда мәрхүмдәрҙең яҡындарының күҙ йәштәре, оло юғалтыу ҡайғыһы һүрәтләнә. Автор ваҡиғаларҙы яңынан тергеҙеү маҡсаты ҡуймай, ә бары тик улар тураһындағы яҡты иҫтәлектәрҙе онотмау.