Рәсәйҙә һәм Башҡортостанда «Сәнғәт төнө» бик матур үтергә оҡшай. Республиканың барлыҡ мәҙәниәт учреждениелары 3 ноябрҙә буласаҡ сараға әҙерләнә. Улар араһында лайыҡлы урыны булған Хәрби Дан музейы ла үҙенә киләсәк ҡунаҡтарға, Бөйөк Ватан һуғышында Еңеүҙең 70 йыллығына һәм Халыҡтар берҙәмлеге көнөнә арналған ҙур сара әҙерләй. Беренсенән, музей киске сәғәт 6-нан төнгө 11-гә тиклем асыҡ буласаҡ. Бында кис буйы хәрби-тарихи реконструкция һәм Рәсәй хәрби-тарихи йәмғиәтенең төбәк бүлексәһе клубтары эшләйәсәк. Сараны йырсылар, музыканттар, шиғыр уҡыусылар сығыштары биҙәйәсәк. Музейҙа «Фронт хаттары» өс мөйөшлө хаттарҙы бөкләү буйынса оҫталыҡ дәресе ойоштороласаҡ. Тағы ла, «Бөтә Өфө» телекомпанияһының «Фронт хаттары» проектының видеороликтарын күрһәтеү күҙ уңында тотола. Артабан, Бөйөк Ватан һуғышы осоро фотодокументтарының электрон базаһы булдырыу ҡаралған. Һәм «Сәнғәт — балалар күҙлегенән» тип аталған уйын майҙансығы булыуы көтөлә. Иң ҡыҙығы, музейға хәрби формала килеүселәр унда бушлай инә ала. Анығыраҡ мәғлүмәттәрҙе 260-44-64; 260-44-16 телефондары аша шылтыратып белешергә мөмкин.