Республиканың мәҙәни донъяһы көҙгөһө, Өфөнөң төп мәҙәниәт усаҡтарының береһе, Х. Әхмәтов исемендәге Башҡорт дәүләт филармонияһы ошо арала ҙур этно-рок фестиваль ойошторорға йыйына. Был хаҡта эстрада буйынса художество етәксеһе Илшат Фәхертдинов белдерҙе. Учреждение етәкселеге хуплауы менән, был маҡсатты тормошҡа ашырыу өсөн филармонияға йәш һәм популяр “Арғымаҡ” төркөмө эшкә саҡырылған. «Арғымаҡ» этно-рок төркөмө — Халыҡ-ара, бөтә Рәсәй, республика конкурстары һәм фестивалдәре лауреаты. Ойоштороу эштәренең ҙур өлөшөн үҙ өҫтөнә алған “Арғымаҡ” егеттәре сентябрь айында эш башлаған да инде. Был ҙур сараға тиклем, 29 ноябрҙә улар Екатерина Ямщикованың «Һандуғасҡай» исемле концертында ҡатнаша.