Башҡортостанда Әҙәбиәт йылын асыу кисәләре әле бер, әле икенсе урында уҙып тора. Ошо көндәрҙә тантаналар Учалы ҡалаһында ла гөрләне. Төбәктәрҙең әүҙемлеге ҡыуандыра – тимәк, халыҡ­ты әҙәбиәткә ылыҡтырыу эше яйға һалына.

Учалылағы байрам ҡала һәм ауыл мәктәп­тәрендә уңышлы эшләгән башҡорт, урыҫ теле һәм әҙәбиәте уҡытыусыларын, китапхана хеҙ­мәткәрҙәрен ҡотлау, уларға Рәхмәт хаты тап­шырыуҙан башланды. Артабан һүҙ башҡорт халыҡ ижадына, милли әҙәбиәткә күсте. Был йәһәттән мәктәп уҡыусылары отҡорлоҡ күрһәтте – “Урал батыр” эпосынан өҙөк, Мостай Кәрим­дең “Күкрәгемдән ҡоштар осорам” һәм Ш. Ба­бичтың “Кем өсөн?” шиғырҙарын яттан һөй­ләне. Шулай уҡ С. Юлаев, М. Аҡмулла. Ш. Ба­бич, М. Кәрим, Я. Ҡолмой, Р. Ға­рипов, Р. Бик­баев кеүек халҡыбыҙҙың бөйөк улдарының ижады хаҡында телмәр тоттолар. Урыҫ әҙә­биәтенә лә иғтибар бүленде: А. Пушкин, Л. Толстой, А. Че­хов, Б. Пастернак, А. Блок кеүек шәхестәрҙең әҫәрҙәренән өҙөктәр яңғыраны.

Учалы Яҙыусылар ойошмаһының яуаплы секретары Әҡлимә Сафина әҙәбиәттәге бөгөнгө проблемалар, ижади ҡыуаныстар хаҡында сы­ғыш яһаны, шулай уҡ былтыр ойошмаға алын­ған йәш шағирҙарҙы ҡотлап, уларға ижади уңыш­тар теләне. Район хакимиәте баш­лығы­ның социаль мәсьәләләр буйынса урын­баҫары Зөһрә Гордеенко йәштәргә райондың 75 йыл­лығына арналған “Ватан” исемле китап бүләк итте.

Балалар ижады йортоноң “Осҡон”, сәнғәт училищеһының “Алтынай” бейеү ансамблдәре үҙенсәлекле сығыштары менән тамашаны йәм­ләне. “Халыҡтар дуҫлығы” бейеүе, кескәй­ҙәр­ҙең өлкәндәрҙе китап уҡырға өйрәтеүе ҡыҙыҡлы бер тамаша булды. 

– Йәмғиәтебеҙҙә компьютерҙарҙы файҙала­ныу йышайған һайын китапҡа иғтибар кәмей бара. Ошо заманда иң тәүге маҡсаттарыбыҙҙың береһе – әҙәбиәткә һөйөү уятыу, – тине йомғаҡ­лау һүҙендә район хакимиәте башлығы Фәрит Дәүләтгәрәев.

Автор: Д. БИЛАЛОВ.

Сығанаҡ: "Башҡортостан" гәзите.