Өфө ҡалаһының иң матур майҙандарының береһендә Башҡорт халыҡ сәсәне, мәғрифәтсе Мөхәмәтша Буранғоловҡа бюст ҡуйыласаҡ.

Халыҡ сәсәненең скульптураһын БР атҡаҙанған мәҙәниәт хеҙмәткәре Хәйҙәр Ғәрипов һынландырған. Был эшкә тотонор алдынан оҫта яҙыусының ижадын, характерын, биографияһын ентекле өйрәнә.

Мөхәмәтша Буранғолов – Башҡорт халыҡ сәсәне, халыҡ ижады ынйыларын йыйыусы мәғрифәтсе, уҡытыусы, ғилми хеҙмәткәр, яҙыусы. Ул оҙаҡ йылдар фольклор туплау менән шөғөлләнеп, халыҡтан риүәйәттәр, легендалар, ҡобайырҙар яҙып ала. «Урал батыр» эпосы ла Хәмит сәсәндән уның тарафынан яҙып алына. Ғилми-тикшеренеү хеҙмәттәре ҙур баһаға лайыҡ, йыйған фольклор материалдары «Башҡорт халыҡ эпосы», «Башҡорт халыҡ ижады» күп томлыҡтарында төп урынды биләй.