Өфөлә Башҡортостандың халыҡ яҙыусыһы Зәйнәб Биишева йәшәгән фатир менән яҡындан танышыу мөмкинселеге бар. 

Коммунистик урамы, 71 һанлы йортта әҙибә оҙайлы йылдар – 1962–1996 йылдарҙа ғүмер итә. Халыҡ яҙыусыһының улы Тельман Әминев фатирҙа ремонт яһаған, шәхси архивын һәм китапханаһын тәртипкә килтергән, әле фотостенд әҙерләү менән мәшғүл. 

Фатирҙа, шулай уҡ, уникаль экспонаттар ҙа бар: «Эрика» немец баҫыу машинкаһы һәм өҫтәле, боронғо лампа, йорт-йыһаздары, автографлы китаптар, яҙыусының ҡулъяҙмалары, шәхси әйберҙәре. Экскурсия барышында Зәйнәб Биишеваның тормош һәм ижад юлына бағышланған видеояҙмалар күрһәтеләсәк.

Ойоштороу эштәре тамамланғас, балалар, йәштәр һәм әҙәбиәт һөйөүселәр халыҡ яҙыусыһы йәшәп ижад иткән йортҡа экскурсиялар менән килә ала.