2 апрель Мостай Кәрим исемендәге 158-се башҡорт гимназияһында "Балалар әҙәбиәте антологияһы"ның исем туйы булды. Сара Халыҡ-ара балалар көнөнә арналды.

Баҫманы төҙөүгә күп көс һалған балалар яҙыусыһы Фәрзәнә Ғөбәйҙуллина, китаптың мөхәррире Зәйнәб Биишева исемендәге Башҡортостан «Китап» нәшриәтенең балалар әҙәбиәте редакцияһы етәксеһе Әлфиә Әсәҙуллина, нәшриәттең директор урынбаҫары Фәрит Әхмәҙиев, балалар шағирәһе, тәржемәсе Рәшиҙә Бик осрашыуға килгәйне. Дәрес форматында үткән баҫманың исем туйы ҡыҙыҡлы һәм фәһемле булды. Уҡыусылар үҙҙәрен ҡыҙыҡһындырған һорауҙарға яуаптар алды. Гимназия китапханаһына автографлы китаптар бүләк ителде. Һәр уҡыусы йөрәгенә асҡыс табырға ынтылған яҙыусылар теләгенә иреште: дәрес аҙағында балалар теләр-теләмәҫ кенә таралышты.

Сығанаҡ: нәшриәт сайтынан алынды.