Башҡорт дәүләт опера һәм балет театрында халыҡ шағиры Рәми Ғариповтың тыуыуына 80 йыл тулыуға арналған сара үтте. 

Был матур сараны Башҡортостан Республикаһы Мәҙәниәт министрлығы һәм Башҡортостан Республикаһы Яҙыусылар союзы ойошторҙо.

Башҡорт шиғриәтенең иң сағыу йондоҙҙарының береһе Рәми Ғариповтың иҫтәлегенә арналған сараға БР Хөкүмәте Премьер-министры урынбаҫары С. Т. Сәғитов, БР мәҙәниәт министры вазифаһын башҡарыусы Камила Дәүләтова, Өфө хакимиәте башлығы урынбаҫары Сынтимер Баязитов БР, республиканың күренекле шәхестәре, әҙиптең яҡындары, замандаштары республиканың төрлө төбәктәренән шәхестең ижадын һөйөүселәр йыйылды. Америка Ҡушма Штаттарынан килгән инглиз теле уҡытыусыһы Линдси Пигей Рәми Ғариповтың шиғырын башҡорт телендә һөйләп, кисәгә йәм өҫтәне. Тамашаға шәхестең ауылдаштары – Салауат районының Арҡауыл ауылы халҡы ла килгәйне. Теле, иле, халҡы өсөн янып йәшәгән һәм ғүмерен биргән шағир исемен мәңгеләштереү буйынса эште дауам итеү мотлаҡ, тип билдәләне улар.

Республика кимәлендә үткәрелгән саранан сәсән Аҡмулланың тыуған төйәге миәкәләр ҙә ситтә ҡалманы. Тамашала шәхестең шиғырҙарына һалынған йырҙар, ғәҙелһеҙлекте һәм ялағайлыҡты тәнҡитләгән шиғырҙар яңғыраны. Киләсәктә шәхес исемен мәңгеләштереү буйынса байтаҡ эштәр башҡарыу ҡарала.