Бөгөн Башҡортостандың Милли музейында мәҙәниәт һәм сәнғәт эшмәкәрҙәрен Рәсәй һәм Башҡортостандың дәүләт һәм ведомство наградалары менән бүләкләү тантанаһы үтте. Сара 15 июндә билдәләнгән Башҡортостан Республикаһының Мәҙәниәт хеҙмәткәрҙәре көнөнә арналды. 

Тантананы БР Мәҙәниәт министры вазифаһын башҡарыусы Дәүләтова Камилә Йәүҙәт ҡыҙы асты һәм сарала ҡатнашыусыларҙы йылы ҡотланы. «Бөгөн һеҙҙе ошо тантанала күреүебегә бик шатбыҙ. Бөгөнгө байрамдың нигеҙен бик күп быуын вәкилдәренең, шул иҫәптән һеҙҙең дә оло ижади ҡаҙаныштарығыҙ тәшкил итә. Һеҙҙе һөнәри байрам менән ихлас ҡотлайым һәм рәхмәтемде еткерәм. Артабан да яңынан-яңы проекттар һәм мәҙәниәт усаҡтары бер генә минутҡа ла эшмәкәрлеген туҡтатмаһын ине тигән теләктә ҡалам» - тине.

Камилә Йәүҙәт ҡыҙы бер төркөм эш алдынғыларына «БР Халыҡ артисы», «БР атҡаҙанған артисы», «БР атҡаҙанған мәҙәниәт хеҙмәткәре» тигән маҡтаулы исемдәр бирелеүе тураһында таныҡлыҡ һәм миҙалдар тапшырҙы. 

Хеҙмәттәре лайыҡлы баһаланыусылар араһында ауыл һәм район мәҙәниәт йорттары директорҙары, хеҙмәткәрҙәре, китапханасылар, балалар музыка мәктәптәре уҡытыусылары, артистар, мәҙәниәт бүлектәре бухгалтерҙары һәм башҡа һөнәр эйәләре бар ине.

Артабан ҡотлауҙар өсөн һүҙҙе Рәсәй мәҙәниәт хеҙмәткәрҙәре профсоюзының республика ойошмаһы рәйесе Александр Кузьменко алды.

Тантана һуңында бүләкләнеүселәр иҫтәлеккә фотоға төштө, бер-береһе менән аралашты һәм тағы ла сәмләнеп эшләрлек дәрт, илһам алып таралышты.

«Башҡортостандың мәҙәни донъяһы» порталы