Стәрлетамаҡ Пионерҙар һарайы заман хореографияһы үҙәгенә әйләнде. «Урам балалары» бейеү фестивале республика йәштәрен йыйҙы. Брейк-данс студиялары «Иң яҡшы коллектив» исеме өсөн көрәште.

Брейкинг, электро, хип-хоп ҡайһы бер йәштәр өсөн бейеү терминдары ғына түгел, ә тормош асылы ла. «Урам балалары» фестивале йәштәр өсөн үҙҙәрен күрһәтеү һәм башҡаларҙы күреү мөмкинлеген дә бирә. Өс номинацияны үҙ эсенә алған ярыш программаһында ҡатнашыусылар брейкинг, шоу һәм экспериментал төрҙәр буйынса көс һынашты. Уларҙы Стәрлетамаҡ, Өфө ҡалаларының заман хореографияһы студияһы етәкселәре баһаланы.

Дүртенсе тапҡыр үткәрелгән фестиваль «Урам тормошо» бейеү коллективының биш йыллыҡ юбилейына арналды. Уның ағзалары шулай уҡ командаларҙың сығыштарын баһалауҙа ҡатнашты.

Дәртле көйҙәр, күңелле мөхит, яҡшы кәйеф йәштәргә үҙҙәрен тулыһынса асырға ярҙам итте. Уларҙың күбеһе киләсәктә бейеүсе булырға хыяллана. Шунлыҡтан әлеге сара ошо йүнәлештә үҫергә теләүселәр өсөн тәүге етди аҙым, ти фестивалде ойоштороусылар.

Рәшит Тайбугин