21 майҙа Мәжит Ғафури исемендәге Башҡорт дәүләт академия драма театры тантаналы рәүештә 95-се юбилей миҙгелен тамамланы. Был көндө театр коллективы Башҡортостандың халыҡ шағиры Мәжит Ғафуриҙың, СССР-ҙың халыҡ артисы Арыҫлан Мөбәрәковтың һәм Башҡортостандың халыҡ шағиры, драматург Мостай Кәримдең һәйкәлдәренә сәскәләр һалды.

Ә кисен театр үҙенең яратҡан тамашасыларына «Хуш, юбилей миҙгеле!» байрам концертын тәҡдим итте. Кисә аҙағында театрҙың художество етәксеһе Олег Закир улы Ханов миҙгел дауамында иң сағыу ролдәр башҡарған таланттарҙы, төрлө цехтарҙа эшләүсе егәрле хеҙмәткәрҙәрҙе билдәләне.

Ваҡиғаларға бай, хәтерҙә уйылып ҡалырлыҡ, тамашасы һағынып һөйләрлек күркәм миҙгел театрыбыҙ йылъяҙмаһына бик күп сағыу биттәр өҫтәне. Театрҙың 95-се юбилей миҙгеле инде тарихта. Киләһе 96-сы ижад миҙгелендә осрашҡанға тиклем, хөрмәтле дуҫтар!