Башҡортостан Республикаһының Мәҙәниәт министрлығы һәм Яҙыусылар союзы хәрби-патриотик темаға ижад ителгән әҫәрҙәргә конкурс иғлан итә. Ике тапҡыр Советтар Союзы Геройы Муса Гәрәйев исемендәге республика конкурсының маҡсаты – илебеҙ тарихына ҡыҙыҡһыныу уятыу, патриотик рухтағы әҫәрҙәр яҙылыуға булышлыҡ итеү, ижади һәләте булған кешеләргә үҙҙәренең оҫталығын күрһәтеү мөмкинлеге биреү, яңы авторҙар асыу. Биш йылға бер тапҡыр үткәреләсәк конкурста Башҡортостан Яҙыусылар Союзы ағзалары ла, шулай уҡ үҙенең ижади һәләтен һынап ҡарарға теләгән республикала йәшәүсе һәр кем ҡатнаша ала. Авторҙарҙың йәше сикләнмәй.
Талаптар:
- Конкурсҡа тәҡдим ителгән эштәр газета-журналдарҙа баҫылмаған, нәшер ителмәгән, башҡа конкурстарҙа ҡатнашып төрлө премиялар менән билдәләнмәгән булырға тейеш.
- Әҫәр рус йәки башҡорт телендә булырға мөмкин. Эштәр Times 14pt шрифты менән компьютерҙа баҫылып, 3 данала ебәрелә. Ҡулъяҙмалар ҡаралмай. Әҫәрҙең күләме 40 биттән дә артмаһын. Башҡорт телендәге эштәрҙең шулай уҡ 3 данала һүҙмә-һүҙ руссаға тәржемәһе булырға тейеш.
- Әҫәрҙә авторға бәйле бер ниндәй ҙә мәғлүмәт булырға тейеш түгел. Авторҙың исем-шәрифтәре, тыуған йылы, көнө, адресы, бәйләнеш өсөн телефоны, ҡыҫҡаса ижади биографияһы, шөғөлө тураһында мәғлүмәттәр айырым ҡағыҙға яҙылып, конвертҡа һалына һәм йәбештереп, әҫәргә беркетелә. Ә эшегеҙҙә әҫәрҙең исеме, жанры, ижад ителгән йылы (ул һуңғы дүрт йылда яҙылған булырға тейеш) һәм псевдоним ғына күрһәтелә.
- Үҙенсәлекле формалы, заманса тел менән яҙылған әҫәрҙәргә өҫтөнлөк биреләсәк.
Эштәр 1 декабргә тиклем түбәндәге адрестар буйынса ҡабул ителә:
Өфө ҡалаһы, Коммунистик урамы, 34, Яҙыусылар Союзы идараһы,
Өфө ҡалаһы, Революцион урамы, 18, Мәҙәниәт министрлығы, 16 кабинет.
Еңеүселәр 25 декабрҙә иғлан ителәсәк.
Белешмәләр өсөн телефон: (347) 273-43-09, 273-30-37.