27 март Башҡорт дәүләт опера һәм балет театры сәхнәһендә Башҡортостандың халыҡ артисы Хөсәйен Мәзитовтың тыуыуына 85 йыл тулыу айҡанлы Марат Хисмәтуллин ҡуйыуында Б.Бикбайҙың «Ҡоҙаса» музыкаль комедияһы ҡуйыласаҡ.

Мәскәү консерваторияһын тамамлаусы Хөсәйен Мәзитов оҙаҡ йылдар опера сәнғәтенә тир түгә. Уның репертуарында башҡорт, рус һәм сит ил композиторҙары әҫәрҙәренән торған 60 яҡын партия иҫәпләнә, сәнғәт һөйөүселәр уларҙы яҡшы хәтерләй, сөнки ниндәй генә партия булмаһын, артист еренә еткереп, бөтә күңелен һалып башҡара. Хөсәйен Йәләй улы Башҡорт дәүләт филармонияһында ла эшләп өлгөрә. Халыҡ йырҙарын, башҡорт композиторҙары әҫәрҙәре оҫта йырлауы менән дә дан ҡаҙана. Өфөлә музыка-педагогия училищеһын асыу идеяһы ла уныҡы, әйткәндәй Хөсәйен Мәзитов унда вокал дәрестәрен дә алып бара.

«Ҡоҙаса» спектакле күптән республиканың визит карточкаһына әүерелде, сит илдәрҙә лә ҡуйылды. Ильяс партияһы Хөсәйен Мәзитовтың иң яратҡан ролдәренең береһе була.

Ролдәрҙә:

Наза – Эльвира Алкина

Басир – Әлим Ҡәйүмов

Яппар – Салих Сөләймәнов

Шәмсиә – Светлана Арғынбаева

Мулла – Олег Килмөхәмәтов

Мәхмүзә – Гөлнур Нарынбаева

Ильяс – Руслан Хәбибәллин

Әхмәт – Илгиз Хәкимов

Автор: Марина Луговая