Иглин районында буласаҡ әсәйҙәр һәм сабыйҙар өсөн уҡыу үҙәге булараҡ моделле балалар китапханаһы асылды. Тәү тапҡыр муниципаль район һәм ҡалаларҙа моделле китапханаларҙы төҙөү республика проекты 2004 йылдан тормошҡа ашырыла. Әлеге ваҡытта республикала барлығы 137 моделле китапхана иҫәпләнә. Әле үҙәк район балалар китапханаһында 20 мең самаһы китап, 2 мең уҡыусы иҫәпләнә. Уның фондында әллә күпме гәзит-журнал, ҡулланма әҙәбиәт бар. Яңы бинаға күсенгәндән һуң әкиәт, эшлекле аралашыу бүлмәләре асылды. Улар яңы мебель менән йыһазландырылған. Әйткәндәй, республика, район хакимиәте ярҙамында китапханала компьютер технологияһы комплекты һатып алынған. Интернет селтәренә инеү мөмкинлеге бар. Быға китап һөйөүселәр ҙә, хеҙмәткәрҙәр ҙә шат.
 Ләйсән Ҡоланбаева
 «БСТ» сайтынан