«Ике төш» күрә сәхнә…
7 майҙа, Бөйөк Еңеүҙең 70 йыллығын билдәләгән тантаналы көндәрҙә, Мәжит Ғафури исемендәге Башҡорт дәүләт академия драма театры сәхнәһендә Мөҙәрис Бағаев пьесаһы буйынса «Ике төш» драмаһының премьераһы үтәсәк.
Әҫәр һуғыш һәм кешеләр яҙмышы, йәшәү һәм мәңгелек хаҡында.
«Бормаланып аға Ашҡаҙарҡай,
Саф көмөштәй уның һыуҡайы.
Ниңә яҙмыш шулай әсе икән -
Башҡынама һыймай уйҡайым», -
йөрәк әрнеүҙәрен әлеге бер ошо йыры менән баҫҡан Миңзифа инәйгә ғүмере буйы ике төш тынғы бирмәй.
– Инде нисәмә йыл шуны тыңлап, нисәмә йыл күҙҙәрем йәшкә мансыла бит.
– Инде нисәмә йыл башҡа бер нәмә лә күрмәй, шул ике төшөң менән генә йәшәйһең, бахырҡай. Йә, башла һуң, – ти әбейҙең хәлен белешергә ингән килене Гөлшат.
– Һөйләйем, әтүсә… Сәлим, Кәрим, Хәлим ҡулдарын болғай-болғай ҡапҡанан сыға. Бергә ҡосаҡлашҡан килеш Миңзифа, Гөлшат, Сәлимә, Кәримә, Хәлимә йәшле күҙҙәрен һөрткөләп ҡул болғап ҡала...
...Яҙ етеп ерҙең ҡарҙан ныҡлап әрселә башлаған сағы икән, байтаҡ бойҙай ятып ҡалған, имеш, ҡар аҫтында...
Миңзифа инәйҙең төштәренә, әйтерһең, һуғыш йылдарының бар ауырлығы, йәшәү менән үлем көрәше, әҙәм затының ныҡлығын һынау, кешелек хистәре, йәшәү ҡәҙерен белеү асылдары һыйған.
Спектаклдең режиссеры – Олег Ханов, ҡуйыусы-рәссам – Альберт Нестеров, композиторы – Илшат Яхин, балетмейстеры – Сулпан Асҡарова.
