Тылдағы ҡатын-ҡыҙҙар, бала-саға, ҡарт-ҡоролар түҙемлегенә хайран ҡалып, тағы бер һоҡланды йәш быуын. Һуғыш һалған тәрән яралар, ҡыйралған яҙмыштар һәм донъяны ҡайтанан тергеҙеү, кеше рухы, йәшәү ҡәҙере һәм тыныслыҡ хаҡында сәнғәт теле – шиғырҙар һәм йырҙар аша йөрәктәргә үтерлек рухта әҙерләнгән был әҙәби-музыкаль тамашаны залда ултырыусылар тын да алмай, кемдәрҙер күҙ йәштәре аша ҡараны. (Проект авторы һәм режиссер - Хөрмәтулла Үтәшев). Тарихи видеояҙмалары менән сәхнә берсә тотошлайы менән йә һуғыш яланын, йә тылдағы ҡатын-ҡыҙҙар, бала-сағалар тир түккән иген баҫыуын, йә тағы һалдаттарҙың казармаһын хәтерләтте...

Тыуған илгә мөхәббәт, намыҫ һәм рух ныҡлығы тәрбиәләгән, театрҙың бөтә труппаһы ҡатнашҡан был күләмле ижади сара - театр мәҙәниәтендә ваҡиға булырлыҡ ҙур тамаша 8 май көндө лә бар тулылығында сәхнәлә йәнә уйналасаҡ. Рәхим итегеҙ, ҡәҙерле тамашасылар!