Ижади осрашыуҙы уҡыу йортоноң ректоры Ә.И. Әсфәндиәрова асты. Әминә Ибраһим ҡыҙы сараның мөһимлеген билдәләне һәм яҡташыбыҙға, ваҡытының тығыҙлығына ҡарамаҫтан, осрашыуға килгәне өсөн оло рәхмәтен белдерҙе.

Илдар Абдразаҡовтың остазы, РСФСР-ҙың атҡаҙанған сәнғәт эшмәкәре, сәнғәт академияһы профессоры М.Ғ. Мортазина ла осрашыуҙа ҡатнашты. Миләүшә Ғәли ҡыҙы үҙенең «йондоҙло» уҡыусыһы хаҡында һөйләп китте:

- Сәнғәт институтында уҡыған сағында Илдарҙы уҡыуҙы артабан дауам итергәме, әллә ташларғамы тигән һорау борсой башланы. Әммә яйлап бөтәһе лә үҙ урынына ултырҙы, IV курста иһә ул Мариин театры солисы ине. Илдарҙың осрашыуға риза булыуына бик шатмын. Тағы ла мине шуныһы ғәжәпләндерә, ул һаман да миңә уҡыусы һымаҡ килә. Уның йондоҙ ауырыуы булмауы, тамырҙарын онотмауы мине һоҡландыра һәм уҡытыусыһы булараҡ ҡыуандыра. Илдар бик йәш әле, уны алда тағы ла ҙурыраҡ үрҙәр көтә.

Һуңынан оҫталыҡ дәрестәре үтте. Уҡыу йортоноң вокал бүлеге студенттары донъя классикаһынан төрлө әҫәрҙәр башҡарҙы һәм Илдар Абдразаҡовтан төплө кәңәштәр алдылар.