Учалы ҡалаһынан йәш йырсы Илдар Ямалов «Урал дуҫтарын йыя» Халыҡ-ара конкурс-фестивалдә Гран-при яуланы. Халыҡ йыры «Абдрахман»ды башҡарып, Илдар жюри ағзаларын һәм тамашасыны таң ҡалдырҙы.
Өсөнсөгә үткән был конкурс-фестиваль 14–17 февралдә Силәбелә үтте. Конкурсанттарҙы абруйлы жюри баһаланы: Берлин симфоник оркестры солисы Кристина Гайслер, Мәскәү академик хор сәнғәте доценты Лариса Рощина һәм Мәскәү опера студияһы дирижеры Евгения Грасеева. Учалы сәнғәт һәм мәҙәниәт колледжы студенты, бер үк ваҡытта Учалы филармонияһы солисы Илдарға жюри үҙенең кәңәштәрен бирҙе, артабан да үҙенең өҫтөндә эшләргә саҡырҙылар.
«Уҡытыусым Дилара Сәхәүетдинова мине конкурсҡа һәйбәт әҙерләне, призлы урын алырға өмөт бар ине, әммә гран-при алырмын тип уйламағайным», – ти йырсы.
Әле Илдар «Башҡорт йыры» һәм «Дуҫлыҡ моңо» конкурстарында ҡатнашырға йыйына. Сығанаҡ: «Башинформ» мәғлүмәт агентлығы