Мәжит Ғафури исемендәге Башҡорт дәүләт академия драма театрында күренекле актер, драматург, педагог Илшат Йомағоловтың хәтер кисәһе үтте. Быйыл уға 80 йәш тулған булыр ине. Актер иҫтәлегенә режиссер Илдар Ғиләжев ҡуйған «Нәркәс» пьесаһы күрһәтелде.

Рәсәйҙең һәм Башҡортостандың атҡаҙанған артисы Илшат Йомағоловтоң башҡорт драматургияһын үҫтереүгә индергән өлөшө ҙур. Ул тамашасыларға талантлы актер булараҡ та билдәле. Театр һөйөүселәргә иң сағыу әҫәрҙәренең береһе «Нәркәс» трагедияһын тәҡдим итте.

«Нәркәс» пьесаһы 1968 йылда яҙылған. Ә сәхнәгә тәү тапҡыр 2001 йылда ҡуйыла. 2004 йылда спектакль халыҡ-ара театр фестивале дипломанты исемен яулай. Спектаклдә төрлө быуын актерҙары үҙ ролдәрен яратып башҡара. Танылған актерҙың һәләте уның балаларына ла күскән. Төп ролдә актерҙың ҡыҙы Айһылыу Йомағолова уйнай. 

Сәхнә оҫтаһы, һәләтле шәхес Илшат Йомағолов бар ғүмерен башҡорт театр сәнғәтен үҫтереүгә бағышлай. Сәхнәлә 50 артыҡ онотолмаҫ образдар тыуҙыра, фильмдар ҙа уға киң танылыу килтерә.