М. Ғафури исемендәге Башҡорт дәүләт академия драма театры мәшһүр актер һәм драматург Илшат Йомағоловтың исемен онотмай. Уның әлеге мәлдә ҙур уңыш менән барған «Нәркәс» трагедияһы уның яҡты иҫтәлегенә бағышлана.

Драматург һәм актер Илшат Йомағолов - үткер ҡәләме аша ла, башҡарған ролдәре менән дә башҡорт драматургияһын һәм театр сәнғәтен үҫтереүгә тос өлөш индерҙе.

Күп кенә спектаклдәрҙә төп ролдәр башҡарғас, үҙе лә пьеса яҙып ҡарарға уйлай. Шулай итеп, Илшат Хәлил улы 1968 йылда сәнғәт донъяһына «Нәркәс» трагедияһын тәҡдим итә. Халыҡ премьераны оҡшата һәм ул тиҙ арала билдәлелек яулай: төрлө фестивалдәрҙә, смотрҙарҙа приздар, маҡтаулы исемдәр ала. Хәҙер ул инде 40 йылдан ашыу сәхнәләрҙән төшмәй, урыҫ һәм башҡа телдәргә тәржемә ителгән. «СССР халыҡтары драматургияһы» фестивалендә I дәрәжә дипломға лайыҡ була. М. Ғафури исемендәге Башҡорт дәүләт академия драма театрында ла ул 10 йылдан ашыу бара, ошо арала 100-сө тапҡыр ҡуйыласаҡ.